Du na ra ai Jinghpaw Nawku Hpawng

Tsaw ra ai Jinghpaw Wunpawng sha ni e,

America U.S.A mungdan a Sinpraw hkingau, Sinpraw Dingdung mayan, Ka-ang Atantic gaiwang ginra kata Virginia mungdaw na Charlottesville mare hta lai wa sai 1999 ning December 25 ya shani hta Jinghpaw Wunpawng amyu sha ni wunawng wuwa ga daga sa du let No. 1 lang ngu na Hkristmas Poi Kaba hpe grai awng dang ai hte galaw la lu sai.

Mau hpa lam gaw, lai wa sai shaning 2008 ning Dec. 25 hta No. 10 Lang ngu na Hkristmas Poi Kaba hpe mung dai Charlottesville mare hta nan bai sa galaw la lu ai lam hpe myit yu yang anhte Wunpawng sha ni yawng a ding yang myit hkrum shabawn ai lam hta Karai Kasang a shaman chyeju teng teng nan hkan nang ai lam hpe sakse mu lu saga ai re.

Ya du na ra ai Sept. 27, 2009 (Laban Shani) 1:00 P.M. hta gaw Wunpawng sha ni a labau shang myit hkrum majoi ginra rai nga ai Charlottesville mare na First Baptist Church Nawku Jawng kata hta Karai Kasang anhte hpe jaw da ai tinang a mahku nsen hte shawng ningnan lang ngu na Jinghpaw Nawku Hpawng Kaba hta alu sha sa du dung nawku shang lawm na hpe akroi anoi hpyi lajin saw shaga dat nngai law.

NAWKU NHTOI: SEPTEMBER 27, 2009
NAWKU HPAWNG ATEN: 1:00P.M.
NAWKU SHARA: FIRST BAPTIST CHURCH
735 Park St
Charlottesville, VA 22902



Hkristu hta saw shaga ai,

Sara Sumhka Seng Nan
Ningbaw
Mid-Atlantic Jinghpaw Hkristan Kanawn Mazum Hpung

Matsing: MKCF hku nna shata 2 hta kalang hpawng ai Jinghpaw Nawku Hpawng a malai ndai Nawku Hpawng hta alu sha sa du shang lawm ga. Sept. 12 ya shani Duwa Dingra Tang Gun a nta kaw zuphpawng galaw na malai ndai Sept. 27 shani hte kapyawn nna JINGHPAW KANAWN MAZUM HPAWNG hpe galaw kau sana hku re.